மொபைல் எண்ணை மறைக்கும் புதிய வசதி! வாட்ஸ்அப் பயனர்களுக்கு விரைவில் முக்கிய வசதி!

 உலகளவில் கோடிக்கணக்கான மக்கள் பயன்படுத்தி வரும் வாட்ஸ்அப் செயலி, பயனர்களின் தனியுரிமை மற்றும் பாதுகாப்பை மேலும் வலுப்படுத்தும் வகையில் புதிய வசதி ஒன்றை அறிமுகப்படுத்தத் தயாராகியுள்ளது. இந்த புதிய மாற்றத்தின் மூலம், இனி பயனர்கள் தங்களது மொபைல் எண்ணை வெளிப்படுத்தாமல், தனித்துவமான Username (பயனர் பெயர்) மூலமாக மற்றவர்களுடன் தொடர்புகொள்ளும் வாய்ப்பைப் பெற உள்ளனர்.

தற்போது வாட்ஸ்அப்பில் ஒருவரை தொடர்புகொள்ள அவரது மொபைல் எண் அவசியமாக உள்ளது. ஆனால் விரைவில் அறிமுகமாகவுள்ள புதிய வசதியின் மூலம், பயனர்கள் தாங்களே விருப்பமான ஒரு Username-ஐ உருவாக்கி, அதன்மூலம் செய்திகளைப் பரிமாறிக்கொள்ள முடியும். இதனால், குறிப்பாக அறிமுகமில்லாத நபர்களுடன் உரையாடும் சூழலில் மொபைல் எண் வெளிப்பட வேண்டிய அவசியம் இருக்காது.

இந்த வசதி உலகம் முழுவதும் உள்ள பில்லியன் கணக்கான வாட்ஸ்அப் பயனர்களுக்கு அடுத்த சில மாதங்களில் படிப்படியாக வழங்கப்படும் என தகவல்கள் தெரிவிக்கின்றன. இருப்பினும், இது கட்டாய அம்சமாக இருக்காது. விருப்பமுள்ள பயனர்கள் மட்டுமே இந்த வசதியை செயல்படுத்த முடியும்.

புதிய Username-ஐ பதிவு செய்த பிறகும், தேவையெனில் அதை எப்போது வேண்டுமானாலும் மாற்றவோ அல்லது நீக்கவோ பயனர்களுக்கு அனுமதி வழங்கப்படும். ஒரு Username-இல் குறிப்பிட்ட எண்ணிக்கைக்குள் மட்டுமே எழுத்துகள், எண்கள் மற்றும் சில குறியீடுகளை பயன்படுத்த முடியும் என்றும் கூறப்பட்டுள்ளது.

மேலும், பிரபலங்கள், அரசியல்வாதிகள் அல்லது நிறுவனங்களின் பெயர்களை தவறாக பயன்படுத்தி போலி கணக்குகள் உருவாகாத வகையில் பல்வேறு பாதுகாப்பு கட்டுப்பாடுகளும் இந்த அமைப்பில் இடம்பெறவுள்ளன. இதன் மூலம் போலி அடையாளங்களை கட்டுப்படுத்தும் முயற்சியும் மேற்கொள்ளப்பட்டுள்ளது.

அதேநேரம், வாட்ஸ்அப் கணக்கை முதன்முதலில் உருவாக்குவதற்கு மொபைல் எண் தொடர்ந்தும் அவசியமாக இருக்கும். ஆனால் Username வசதியை பயன்படுத்திய பிறகு, மற்ற பயனர்களுக்கு அந்த எண்ணை காட்டாமல் உரையாட முடியும் என்பது இந்த மாற்றத்தின் முக்கிய சிறப்பம்சமாகும்.

குறிப்பாக, பல்வேறு வாட்ஸ்அப் குழுக்களில் இணைந்திருக்கும் பயனர்கள் தங்களது தனிப்பட்ட மொபைல் எண்ணை அறிமுகமில்லாதவர்களுடன் பகிர வேண்டிய நிலை குறையும் என தொழில்நுட்ப நிபுணர்கள் கருதுகின்றனர். தனியுரிமையை விரும்பும் பயனர்களுக்கு இந்த புதிய வசதி கூடுதல் பாதுகாப்பையும், நம்பிக்கையுடனான தொடர்பாடலையும் வழங்கும் முக்கிய முன்னேற்றமாக பார்க்கப்படுகிறது.