நிதி மோசடி வழக்கில் சீன தொழிலதிபருக்கு 30 ஆண்டு சிறைத் தண்டனை!

அமெரிக்காவில் பெரும் கவனம் பெற்ற நிதி மோசடி வழக்கில், சீனாவைச் சேர்ந்த தொழிலதிபரும் கோடீஸ்வரருமான குவோ வெங்குய்க்கு 30 ஆண்டுகள் சிறைத்தண்டனை விதிக்கப்பட்டுள்ளது. நியூயோர்க் மன்ஹாட்டனில் உள்ள கூட்டாட்சி நீதிமன்றம் இந்தத் தீர்ப்பை வழங்கியுள்ளதாக சர்வதேச ஊடகங்கள் செய்தி வெளியிட்டுள்ளன.

'மைல்ஸ் குவோ' என்ற பெயராலும் அறியப்படும் குவோ, சீன கம்யூனிஸ்ட் அரசின் கடுமையான விமர்சகராக தன்னை வெளிப்படுத்தியிருந்தார். அந்த அடையாளத்தை பயன்படுத்தி உலகின் பல நாடுகளில் வாழும் ஆயிரக்கணக்கான ஆதரவாளர்கள் மற்றும் முதலீட்டாளர்களிடம் இருந்து பெருமளவில் நிதி திரட்டியதாக குற்றச்சாட்டுகள் முன்வைக்கப்பட்டன

விசாரணையின் போது, கிரிப்டோகரன்சி முதலீடுகள், தனியார் வணிகத் திட்டங்கள் மற்றும் அதிக லாபம் தருவதாக கூறப்பட்ட பல்வேறு முதலீட்டு வாய்ப்புகள் மூலம் பல நூறு மில்லியன் டொலர்கள் வசூலிக்கப்பட்டது நீதிமன்றத்தில் எடுத்துரைக்கப்பட்டது. இந்த நடவடிக்கைகள் 2018 முதல் 2023 வரை நடைபெற்றதாக அதிகாரிகள் தெரிவித்துள்ளனர்.

முதலீட்டாளர்களிடம் இருந்து பெறப்பட்ட நிதியின் ஒரு பெரிய பகுதி திட்டங்களில் பயன்படுத்தப்படாமல், தனிப்பட்ட ஆடம்பர வாழ்க்கைக்காக செலவிடப்பட்டதாகவும் வழக்கில் கூறப்பட்டது. அதன்படி, நியூஜெர்சியில் சொகுசு மாளிகை, உயர்தர படகுகள், லம்போர்கினி மற்றும் பெராரி உள்ளிட்ட விலையுயர்ந்த வாகனங்கள் வாங்கப்பட்டதாக நீதிமன்ற ஆவணங்களில் குறிப்பிடப்பட்டுள்ளது.

இந்த வழக்கில் கடந்த ஆண்டு குவோ மீது பணமோசடி, முதலீட்டு மோசடி மற்றும் பாதுகாப்பு சட்டங்களை மீறிய குற்றச்சாட்டுகள் நிரூபிக்கப்பட்ட நிலையில், தற்போது தண்டனை அறிவிக்கப்பட்டுள்ளது. மேலும், மோசடி செய்யப்பட்ட தொகையில் சுமார் 889 மில்லியன் அமெரிக்க டொலர்களை மீட்டுச் செலுத்தவும் நீதிமன்றம் உத்தரவிட்டுள்ளது.

தீர்ப்பை வழங்கிய நீதிபதி, ஜனநாயகத்தை ஆதரிக்கும் நோக்கத்துடன் நிதி வழங்கியவர்களின் நம்பிக்கையை தவறாக பயன்படுத்தி, அவர்களின் வாழ்நாள் சேமிப்பை இழக்கச் செய்திருப்பது மிகவும் கவலைக்குரிய செயல் எனக் குறிப்பிட்டார். இந்த மோசடியால் பாதிக்கப்பட்ட பலர் நீதிமன்றத்தில் ஆஜராகி, தாங்கள் சந்தித்த பொருளாதார இழப்புகள் மற்றும் மனவேதனைகளை உணர்ச்சியுடன் பகிர்ந்து கொண்டதாக தெரிவிக்கப்பட்டுள்ளது.

இதற்கிடையில், குவோ தனது மீதான அனைத்து குற்றச்சாட்டுகளையும் தொடர்ந்து மறுத்து வருகிறார். இந்த வழக்கு அரசியல் நோக்கத்துடன் முன்னெடுக்கப்பட்டதாகவும், தன்னை குறிவைத்து மேற்கொள்ளப்பட்ட நடவடிக்கையாகவே இதை கருதுவதாகவும் அவர் தெரிவித்துள்ளார். அதேவேளை, நீதிமன்றத்தின் இந்தத் தீர்ப்பை எதிர்த்து மேல்முறையீடு செய்ய உள்ளதாகவும் அவரது தரப்பு அறிவித்துள்ளது.