பாடசாலை மாணவர்களிடையே வேகமாக பரவும் மூளைக்காய்ச்சல்! சுகாதாரத்துறை விடுத்துள்ள அவசர எச்சரிக்கை!

 நாட்டின் பல பகுதிகளில் பள்ளி மாணவர்களிடையே வைரஸ் மூலம் ஏற்படும் மூளைக்காய்ச்சல் நோய் அதிகரித்து வருவதாக சுகாதாரத் துறையினர் எச்சரிக்கை விடுத்துள்ளனர். இருப்பினும், இந்த நிலைமையை கட்டுப்படுத்த தேவையான நடவடிக்கைகள் மேற்கொள்ளப்பட்டு வருவதால், பொதுமக்கள் தேவையற்ற அச்சத்தில் ஆழ வேண்டாம் என மருத்துவ நிபுணர்கள் அறிவுறுத்தியுள்ளனர்.

சுகாதார அதிகாரிகள் வெளியிட்ட தகவலின்படி, ஆரம்பத்தில் தென் மாகாணப் பகுதியில் சில மாணவர்களுக்கு இந்த நோய் அறிகுறிகள் பதிவாகியிருந்த நிலையில், தற்போது மத்திய மற்றும் மலையகப் பகுதிகளிலும் இதே போன்ற பாதிப்புகள் காணப்படுகின்றன. குறிப்பாக தியத்தலாவ, வெலிமடை மற்றும் கண்டி உள்ளிட்ட பகுதிகளில் பல மாணவர்கள் சிகிச்சைக்காக மருத்துவமனைகளில் அனுமதிக்கப்பட்டுள்ளதாக தெரிவிக்கப்பட்டுள்ளது.

இந்த நோய் ஒரு வகை வைரஸ் தொற்றால் ஏற்படக்கூடிய மூளைக்காய்ச்சல் தன்மையுடையதாக இருக்கலாம் என சந்தேகிக்கப்படுவதால், நோய்ப்பரவல் தொடர்பான விரிவான ஆய்வுகள் மேற்கொள்ளப்பட்டு வருகின்றன. மாகாண சுகாதார அதிகாரிகள் மற்றும் நோய்ப்பரவலியல் பிரிவு இணைந்து மாணவர்களின் உடல்நிலை, பாடசாலை சூழல் மற்றும் உணவு–நீர் தொடர்பான காரணிகளை ஆய்வு செய்து வருகின்றனர்.

நோயின் ஆரம்ப அறிகுறிகளாக அதிக காய்ச்சல், கடுமையான தலைவலி, வாந்தி, உடல் சோர்வு மற்றும் சிலருக்கு மயக்கம் போன்ற நிலைகள் பதிவாகியுள்ளதாக மருத்துவர்கள் குறிப்பிட்டுள்ளனர். அறிகுறிகள் தென்பட்டவுடன் உடனடியாக மருத்துவ சிகிச்சை பெறுவது மிகவும் அவசியம் என்றும் அவர்கள் வலியுறுத்தியுள்ளனர்.

மருத்துவ நிபுணர்கள் கூறுகையில், இந்த நோய் ஆரம்ப நிலையிலேயே கண்டறியப்பட்டால் சில நாட்களுக்குள் சிகிச்சை மூலம் கட்டுப்படுத்த முடியும் என்றும், பொதுவாக 5 முதல் 7 நாட்களுக்குள் நோயாளிகள் குணமடையும் வாய்ப்பு இருப்பதாகவும் தெரிவித்துள்ளனர். தற்போது சிகிச்சை பெற்று வரும் மாணவர்களின் உடல்நிலையும் கண்காணிக்கப்பட்டு வருவதாக கூறப்படுகிறது.

இதேவேளை, மழைக்கால சூழ்நிலை மற்றும் பொதுமக்கள் அதிகமாக கூடும் நிகழ்வுகள் காரணமாக நோய் பரவும் அபாயம் அதிகரிக்கக்கூடும் எனவும் எச்சரிக்கப்பட்டுள்ளது. குறிப்பாக அசுத்தமான குடிநீர், சுகாதாரமற்ற உணவுப் பொருட்கள் மற்றும் சுத்தமின்மை ஆகியவை வைரஸ் பரவலுக்கு காரணமாக இருக்கக்கூடும் என்பதால் மக்கள் மிகுந்த கவனத்துடன் இருக்குமாறு அறிவுறுத்தப்பட்டுள்ளது.

பாடசாலை மாணவர்கள் வெளியில் வாங்கும் உணவுகளை தவிர்க்க வேண்டும் என்றும், கைகளை சுத்தமாக கழுவுதல், கொதிக்கவைத்த நீரை மட்டும் அருந்துதல், உடல்நலக் குறைவு ஏற்பட்டால் உடனடியாக மருத்துவமனை செல்லுதல் போன்ற சுகாதார நடைமுறைகளை கடைப்பிடிக்க வேண்டும் என்றும் சுகாதாரத் துறையினர் கேட்டுக்கொண்டுள்ளனர்.