போர் நிறுத்தம் முடிவுக்கு வருமா? வான்வெளியை முழுமையாக மூடிய ஈரான்!

 மத்திய கிழக்கில் நீடித்து வரும் பதற்றநிலை மீண்டும் தீவிரமடைந்து வரும் சூழலில், ஈரான் தனது வான்வெளியை முழுமையாக மூடுவதாக அறிவித்துள்ளது. தற்காலிக போர் நிறுத்த ஒப்பந்தம் விரைவில் முடிவடைய உள்ள நிலையில், இந்த அறிவிப்பு சர்வதேச அரசியல் வட்டாரங்களில் பெரும் கவனத்தை ஈர்த்துள்ளது.

கடந்த பெப்ரவரி மாதம் 28 ஆம் திகதி தொடங்கிய அமெரிக்கா – ஈரான் மோதல் தொடர்ந்து பல்வேறு தாக்குதல்கள் மற்றும் பதிலடி நடவடிக்கைகளுடன் நீடித்து வருகிறது. அமெரிக்காவின் ஆதரவுடன் மேற்கொள்ளப்பட்ட தாக்குதல்களுக்கு பதிலடியாக, ஈரான் இஸ்ரேல் மற்றும் மத்திய கிழக்கில் உள்ள அமெரிக்க இராணுவ தளங்களை குறிவைத்து தாக்குதல் நடத்தியதாக தகவல்கள் வெளியாகின.

போரின் தீவிரம் அதிகரித்த நிலையில், இரு தரப்பும் 60 நாட்கள் தற்காலிக போர் நிறுத்தத்திற்கு இணக்கம் தெரிவித்திருந்தன. எனினும், அந்த ஒப்பந்தம் நிரந்தர அமைதிக்கான தீர்வை உருவாக்கவில்லை என சர்வதேச ஆய்வாளர்கள் தெரிவிக்கின்றனர். குறிப்பாக, ஈரான் தனது அணு திட்டங்களை கைவிட வேண்டும் என்ற அமெரிக்காவின் கோரிக்கையை தொடர்ந்து நிராகரித்து வருவதால், பேச்சுவார்த்தைகள் முன்னேற்றமின்றி நீடிக்கின்றன.

அமெரிக்கா, ஈரான் யுரேனியம் செறிவூட்டும் நடவடிக்கைகளை உடனடியாக நிறுத்த வேண்டும் என்று வலியுறுத்தி வருகிறது. ஆனால், அது தமது தேசிய உரிமை எனக் கூறும் ஈரான், எந்தவித அழுத்தத்திற்கும் தலைவணங்கப் போவதில்லை என அறிவித்துள்ளது. இதன் காரணமாக இரு நாடுகளுக்கும் இடையிலான பதற்றம் மீண்டும் உச்சத்தை எட்டியுள்ளது.

இந்த நிலையில், போர் நிறுத்த காலம் முடிவடையும் முன் மீண்டும் பெரிய அளவிலான இராணுவ நடவடிக்கைகள் ஆரம்பமாகலாம் என்ற அச்சம் உலக நாடுகளிடையே உருவாகியுள்ளது. அமெரிக்க ஜனாதிபதி டொனால்ட் ட்ரம்ப் அவசர ஆலோசனைகளுக்காக தனது பயண திட்டங்களை ரத்து செய்து வோஷிங்டனுக்கு திரும்பியதாக தகவல்கள் தெரிவிக்கின்றன.

மேலும், அமெரிக்காவின் முக்கியமான நினைவேந்தல் தின நிகழ்ச்சிகளில் பல உயர்மட்ட இராணுவ மற்றும் உளவுத்துறை அதிகாரிகள் பங்கேற்பதை ரத்து செய்துள்ளதாகவும் கூறப்படுகிறது. இது வெள்ளை மாளிகை பாதுகாப்பு சூழ்நிலையை மிகுந்த கவனத்துடன் கண்காணித்து வருவதை காட்டுவதாக அரசியல் வட்டாரங்கள் கருதுகின்றன.

இதற்கிடையில், எந்த நேரத்திலும் அமெரிக்கா அல்லது அதன் கூட்டாளிகள் தாக்குதல் நடத்தக்கூடும் என்ற அச்சத்தின் காரணமாக, ஈரான் தனது வான்வெளியை முழுமையாக மூடுவதாக அறிவித்துள்ளது. சர்வதேச விமான சேவைகள் பலவும் பாதிக்கப்படக்கூடும் என எச்சரிக்கப்பட்டுள்ளது.

அதேவேளை, வெளிநாடுகளில் உள்ள அமெரிக்க இராணுவ முகாம்கள் அனைத்தும் உச்சகட்ட பாதுகாப்பு கண்காணிப்பின் கீழ் வைக்கப்பட்டுள்ளதாகவும் தகவல்கள் தெரிவிக்கின்றன. மத்திய கிழக்கில் நிலவும் இந்த பதற்ற நிலை உலக பொருளாதாரத்தையும் எரிபொருள் சந்தையையும் மீண்டும் பாதிக்கக்கூடும் என்ற அச்சமும் அதிகரித்து வருகிறது.